គ្រួសារលោកគង្គ ប៊ុនឈឿន ទទួលបានទីតម្កល់ធាតុ និងសង់រូបសំណាកនៅបាត់ដំបង

ជាតិ

គ្រួសារលោកគង្គ ប៊ុនឈឿន ទទួលបានទីតម្កល់ធាតុ និងសង់រូបសំណាកនៅបាត់ដំបង

13, Aug 2016 , 4:00 pm

រូបភាព

ដោយ: ខន ចំប៉ា

ក្រុមគ្រួសារលោក គង្គ ប៊ុនឈឿន បានទទួលបានទីតាំងមួយ នៅក្នុងទីធ្លាវត្តពោធិវាល កណ្តាលក្រុងបាត់ដំបងហើយ ដើម្បីសាងសង់បណ្ណាល័យ កន្លែងតម្កល់ធាតុ និងរូបសំណាកលោក គង្គ ប៊ុនឈឿន។

លោកស្រី តាត គឹមលន ភរិយាកវីម្ចាស់ស្ទឹងសង្កែគង្គ ប៊ុនឈឿន បានថ្លែងប្រាប់សារព័ត៌មានថ្មីៗនៅថ្ងៃសៅរ៍នេះថា៖«ខ្ញុំកាលពីដំបូង ខ្ញុំបានស្នើសុំទៅចៅអធិការវត្តពោធិវាល ហើយទើបតែម្សិលមិញយើងបានដំណឹងថាលោកយល់ព្រមឲ្យសង់»។

ទីតាំងដែលព្រះចៅអធិការវត្តយល់ព្រមបរិច្ចាគឲ្យ ដើម្បីសង់បណ្ណាល័យ កន្លែងកម្កល់ធាតុ និងរូបសំណាករបស់លោក គង្គ ប៊ុនឈឿន គឺនៅក្បែរក្លោងទ្វារ ចេញចូលវត្តពោធិវាលតែងម្តង។ នេះបើតាម លោកស្រី តាត គឹមលន ប្រាប់សារព័ត៌មានថ្មីៗ មុននឹងបន្តបញ្ជាក់ពីក្តីរំភើប ដែលខ្លួនអាចសម្រេចបំណងរបស់ស្វាមីយ៉ាងដូច្នេះ៖«ជាភរិយាគាត់ បើសិនជាធ្វើ សម្រេចបំណងគាត់បាន សម្រាប់ខ្ញុំគឺអរពេកហើយ គ្មានអ្វីអរជាងបានសម្រេចក្តីប្រាថ្នារបស់គាត់ទេ»។

យ៉ាងណាក៏ដោយ លោកស្រី គឹមលន មិនទាន់បានកំណត់ពេលវេលា ក្នុងការសាងសង់បណ្ណាល័យ កន្លែងតម្កល់ធាតុ និងរូបសំណាកលោក គង្គ ប៊ុនឈឿន នៅឡើយ ដោយសារក្រុមគ្រួសារនៅមិនទាន់បានរៀបចំប្លង់ និងខ្វះខាតថវិកាសម្រាប់សាងសង់។ ម្យ៉ាងក្រុមគ្រួសារទើបតែទទួលការអនុញ្ញាតពីព្រះចៅអធិការវត្ត។

បើតាម លោកស្រី គឹមលន លោកស្រីនឹងត្រឡប់ទៅប្រទេសន័រវេស ក្នុងពេលឆាប់ៗ ដើម្បីប្រមែប្រមូលថវិកា មកសម្រេចក្តីប្រាថ្នាចុងក្រោយរបស់ស្វាមី ដែលចង់មានទីតម្កល់ធាតុ និងរូបសំណាក នៅក្នុងទឹកដីកំណើត គឺខេត្តបាត់ដំបងនេះឯង។ ទន្ទឹមនឹងនោះ ភរិយាកវីម្ចាស់ស្ទឹងសង្កែ ក៏បានអំពាវនាវដល់សប្បុរសជនដែលស្រឡាញ់ និងគោរពលោក គង្គ ប៊ុនឈឿន ឲ្យជួយសម្រេចក្តីបំណងរបស់ស្វាមីខ្លួនដែរ។

សូមអញ្ជើញស្តាប់ប្រសាសន៍របស់លោកស្រី តាត គឹមលន៖

សូមបញ្ជាក់ថាលោក គង្គ ប៊ុនឈឿន ម្ចាស់កវីស្ទឹងសង្កែបានទទួលមរណភាព ហើយនៅម៉ោង៧ព្រឹកម៉ោងនៅក្នុងប្រទេសន័រវេ ដែលត្រូវនៅម៉ោង១រសៀលម៉ោង នៅកម្ពុជាថ្ងៃទី១៧ខែមេសាកន្លងទៅ៕